Құрғақшылықтан қырылған малдың нақты саны аталды

Еліміздің Маңғыстау мен Қызылорда облыстарында құрғақшылықтан 1714 бас ірі қара өлді. Мұндай мәліметтерді Орталық коммуникациялар қызметінде өткен брифингте ҚР Ауыл шаруашылығы министрі міндетін атқарушы Ербол Қарашөкеев айтты.

Бұл туралы Orda.kz хабарлады.

Оның айтуынша, тек Маңғыстау мен Қызылорда облыстарында ғана құрғақшылықтан мал арам өлді деп есептеледі.

– Ресми түрде Маңғыстау облысында 1161 бас мал өлді, бұл облыстағы мал басының 0,1% құрайды. Қызылорда облысында 553 бас арам кеткен, - деді Қарашөкеев.

Ол бұл көрсеткіштердің өткен жылғы өлім көрсеткішінен төмен екенін баса айтты.

Бұған дейін ұлттық мал өсірушілер қауымдастығының төрағасы Алмасбек Садырбаев құрғақшылық пен жем-шөптің жетіспеушілігінен шаруалар малдың 30 пайызын жоғалтқанын айтқан болатын. Сонымен қатар ол өлім көбейіп, 3 млн астам жануар өлетінін болжаған. Ауыл шаруашылығы министрлігі сарапшының пессимистік болжамын жоққа шығарды.