Қазақстанда пойыз жолаушысын зорламақ болды

Семей вокзалында жолаушылар пойызының бірінде жолаушыны зорлау әрекеті болды. Бұл туралы ҚР ІІМ Көлік полициясы департаментінің баспасөз хатшысы Ләззат Қасымжанова хабарлады.

Аталған дерек ҚР Қылмыстық кодексінің 24-бабы және 120-бабы бойынша желілік полиция басқармасының сотқа дейінгі тергеп-тексерудің бірыңғай тізіліміне тіркелді.

Осы бап бойынша кінәлі бес жылдан сегіз жылға дейінгі мерзімге бас бостандығынан айырылады. Қазіргі уақытта тергеу жүріп жатыр.

«Бұл іс бойынша басқа ақпарат тергеу мүддесі үшін жария етілмейді» делінген көлік полициясы департаментінің хабарламасында.

Еске салсақ, 2018 жылы «Тұлпар-Тальго» пойызының жолаушысын екі жолсерік зорлағаны белгілі болған. Елді дүрліктірген бұл оқиға қоғамда үлкен резонанс тудырды. Сот жолсеріктерді бес жылға бас бостандығынан айырды.