Қазақстанда орыс тілін білмейтіндер қысылып жүр – Рожин

РФ мемлекеттік Думасының депутаты Зюгановтың, оның алдындағы Федоровтың қазақ жеріне, қазақ тіліне қатысты мәлімдемелері аса қызу талқыланған. Ерболат Мұхамеджанның кезекті подкастына үш қазақстандық орыс – Максим Рожин, Геннадий Шиповских және Яков Воронков қатысып, біршама мәселелерді талқылады.

Қазақ тілін жетік меңгерген орыс ұлтының өкілдері Зюганов атаған фактілердің жалған сөз екенін, оған «басты қатырмашы» деп жауап беретіндіктерін жеткізді. Сондай-ақ, Қазақстанда қазақ тілін білмейтін өзге ұлт өкілдеріне қандай қарым-қатынас жасалатыны туралы да сөз болды.

«Менің жұбайымның сіңлісі Алматыға жұмысқа орналасуға барады. Корей тілін үйреніп жүр, қазақ тілін біледі. Алматыда конкурстан өте алмай, жұмысқа қабылданбады. Себебі орыс тілін білмейді. Сонда Қазақстанда кім қысым көріп жүр?» - деді Рожин.

Ал Воронов елімізде «русофобия» емес, «қазақофобия» бар екенін айтып, өзге ұлт өкілдері ешқандай қысым көрмейтінін жеткізді.

«Қазақтілді азаматтар күзетші, бармен, даяшы сияқты жұмыстарға орысша білмейтін, қазақша ғана білетін ауылдың балалары тез орналасады. Бұл – қызық құбылыс қой», - деді Максим Рожин.