Қазақстанда нашар байланыс пен әлсіз интернетке салынатын айыппұлдар өсуі мүмкін

Мәжіліс депутаттары байланыс қызметтерін және интернетке қолжетімділікті нашар көрсеткені үшін байланыс операторларына салынатын әкімшілік айыппұлды көбейтуді көздейтін заңнамаға түзетулер әзірледі.

Парламент мәжілісі цифрлық теңсіздікті жою, интернетке барынша қол жеткізу және жоғары сапалы байланысты қамтамасыз ететін заң қабылдады.

«Заң жобасы ҚР ӘҚБтК-нің 637-бабының 1-бөлігінде көзделген, ірі кәсіпкерлік субъектілері үшін белгіленген талаптарға сәйкес келмейтін байланыс қызметтерін және интернетке қолжетімділікті көрсеткені үшін әкімшілік айыппұлды ұлғайту арқылы байланыс операторларының жауапкершілігін күшейтуге мүмкіндік береді» деді депутат Арман Қожахметов.

Сондай-ақ ол депутаттар әзірлеген заң жобасы азаматтардың сапалы байланыс пен интернетке деген құқықтарын қорғап, операторлар арасындағы бәсекелестікке қосымша жағдай жасайды деп есептейді.