Мыңға жуық сотталғандар түзеу мекемелерінен босатылады

Сенат депутаттары «Қазақстан Республикасы Тәуелсіздігінің 30 жылдығына байланысты рақымшылық жасау туралы» заң жобасын мақұлдады.

Жеңіл және орташа деңгейде қылмыс жасаған сотталушылар түрмеден босатылады. Сонымен қатар, кейбір ауыр және аса ауыр қылмыстар бойынша өтелмеген жаза мерзімін қысқарту қарастырылған.

Алдын ала есептеулер бойынша рақымшылыққа 14 мыңнан астам адам ілінді, 1 мыңға жуық адам түзеу мекемелерінен босатылады, 3,8 мың адам пробациялық есептен шығарылады.

Ішкі істер министрі Ерлан Тұрғымбаевқа шетелдік соттардың үкімімен сотталған қазақстандықтарға рақымшылық жасала ма деген сұрақ қойылды. Ішкі істер министрлігінің басшысы шетелде Қазақстан Республикасының 35 азаматы сотталғанын, олардың кейбірі Қазақстанда жазасын өтеп жатқанын айтты.

– Бір ғана азамат рақымшылыққа ілінсе, 34 азамат аса ауыр және ауыр қылмыс жасаған. Бір адам аса ауыр қылмыс жасап, үш жыл жазасын өтесе амнистияға жатады, - деді Тұрғымбаев.

Рақымшылық ардагерлерге, кәмелетке толмағандарға, қарт азаматтарға, I-II топтағы мүгедектерге және азаматтар мен мемлекеттің қауіпсіздігіне елеулі қатер төндірмейтін басқа да адамдарға қолданылады.

– Қабылданған заң аса қауіпті қылмыс жасаған адамдарға рақымшылық жасауға тыйым салады, бұл қылмыстық ахуалдың нашарлау қаупін болдырмайды. Заңның қабылдануы азаматтарға қателіктерін қайталамауға және жаңа өмір бастауға мүмкіндік береді, - деп түйіндеді Парламент жоғарғы палатасының спикері Мәулен Әшімбаев.