Магистрлік және докторлық диссертациялардың бірыңғай базасы болады

ҚР Білім және ғылым министрлігі барлық ғылыми жұмыстар сақталатын бірыңғай мәліметтер базасын әзірлейді.

Бұл туралы Orda.kz хабарлады.

– Бізде оқу құжаттарының репозиторийі болады. Барлық эсселер, диссертациялар, магистрлік, докторлық, курстық жұмыстар бұдан былай ғылыми жұмыстардың бір репозиторийі арқылы тексерілетін болады. Енді сол шығарманы екінші рет жазу нәтиже бермейді. Жұмыс келер жылы аяқталады. Бұл бізге студенттер мен ғылыми сала арасындағы академиялық тұтастықты қамтамасыз ету жолында тағы бір үлкен қадам жасауға мүмкіндік береді, - деді Білім және ғылым министрі Асхат Аймағамбетов.

Сонымен қатар, докторлық диссертацияларды қорғау тікелей эфирде көрсетіледі.

– 2021 жылдан бастап қорғалған барлық диссертациялар университеттің өзі мен Ұлттық сараптама орталығы сайттарында көпшілікке қол жетімді болады. Енді қорғау нәтижелері бойынша диссертациялық кеңесте төрт нұсқа болады: марапаттау немесе бермеу, қайта қорғауға жіберу немесе қайта қарау, - деп түсіндірді Білім және ғылым министрлігінің басшысы.

Бұған дейін конференцияда Асхат Аймағамбетов 2022 жылдан бастап «Алтын белгі» алуға талап күшейтілетінін айтқан.