Қазақстанда коронавирустың «Дельта плюс» нұсқасы анықталды. Бұл қандай штам?

Қазір Алматы қаласында коронавирустық инфекцияның екі нұсқасы тарап жатыр. Бұл жөнінде бейсенбі күні қаланың бас мемлекеттік санитарлық дәрігері Жандарбек Бекшин ӨКҚ брифингінде мәлімдеді.

Оның айтуынша, кейінгі екі айда аурудың белгілері біршама өзгерген. Күздің алғашқы кезінде, «қыркүйек-қазан айларында диарея синдромы көптеп байқалса, ал қараша-желтоқсанда клиникалық жағдай өзгерді». Нақтырақ айтқанда, нейротоксика белгілері бірінші орынға шықты: дене қызуы көтеріледі, тіпті қабылдау бөлімінде жатқан кейбір науқастардың бірден жансақтау бөліміне түскен кезі болды. «Кома хәлі, санасы бұлыңғырланатын, мидың зақымдалуын көрсететін белгілер кездескен».

– Айналымда дельтадан басқа тағы бір нұсқа бар деген болжам расталды. Тап бүгін нақтыланды. Бейсенбіде секвенирлеуден кейінгі деректер белгілі болды. Алматыдан жіберілген 84 (ПТР коронавирус барын анықтаған – ред.) сынаманың  әзірге алтауынан Delta plus (AY.4.2) штамы табылды. Бұл тек айналымда жүргені, ал оның көлемі кейінірек нақтыланады, – деді Бекшин.

Ресми мәліметке қарағанда, Алматыда 80% межеге жеткізу жоспарланған ұжымдық иммунитет бүгінгі таңда 58,4%-ға орындалған. Бас санитар жұртты жазда әлекке салған дельта штамының түрленген жаңа нұсқасы биыл жаздың басында пайда болғанын айтты. Расында да, жаңа штам жайлы алғаш Ұлыбританияда маусым айының ортасында қоғамдық денсаулық сақтау агенттігі хабарлаған.

ДДСҰ-ның мәліметінше, Delta plus нұсқасы Дельта штамына қарағанда екі есеге қауіпті. Өзге балама деректерде қатер ықтималдығы 10% артық деп көрсетіледі. Айырмашылығы – үнді штамының бастапқы түрінен гөрі K417N мутациясы арқылы өкпе жасушаларына жылдам жабысады да антиденелердің түзілуін баяулатады. Күзде өрши түскен жаңа нұсқа жұқтырғандар қатары ондаған мыңнан асады. Мәселен, Дания, Германия, Израиль, АҚШ, Канада, Ресей және Жапония сияқты елдерде тіркеліп үлгерді.