Қазақстанға карантиндік шектеулер қайта оралуы мүмкін

Егер коронавирус жұқтырғандар саны көбейе берсе, маска режимі қайтарылады.

Бұл туралы мәжілісте ҚР премьер-министрінің орынбасары Ералы Тоғжанов мәлім етті.

«Әзірге ешқандай қиыншылық жоқ, екпе – басты мәселе. Бірақ аурудың өршуіне байланысты және көбеюі жағдайында маска режимін қайтаруға болады. Қазір күніне 100 адамға дейін өсу бар, сондықтан сұрақтар туындап жатыр. Өңіраралық комиссия отырысына карантиндік шараларды күшейту мәселелерін енгізіп жатырмыз. Бұл тек бетпердеге қатысты емес, жалпы алғанда, шараларға қатысты» деді Тоғжанов.

Денсаулық сақтау министрлігіне екпе жұмыстарын күшейту тапсырылды.

Ішкі істер министрлігінің мәліметінше, 29 маусымдағы жағдай бойынша Қазақстанда коронавирус инфекциясының 137 жаңа жағдайы тіркелді. Аурудың басым бөлігі Алматыда – 77 және Нұр-Сұлтанда – 26. Бұл 2022 жылдың наурызынан бергі ең жоғары көрсеткіш.