Қазақстанда іскерлік белсенділік индексі төмендеді

Ұлттық банктің ақша-кредит саясаты департаментінің директоры Жандос Шаймарданов 2020 жылғы желтоқсандағы Қазақстандағы іскерлік белсенділік индексі туралы айтты, деп хабарлайды ORDA.

2020 жылғы желтоқсанда кәсіпорындарға жүргізілген сауалнама нәтижелері бойынша Қазақстандағы іскерлік белсенділік индексі 0,4 пайыздық тармаққа 49,0 дейін төмендеді.

«Индекстің төмендеуі көбінесе құрылыстағы индекстің 3 тармаққа 49,5-ке дейін төмендеуіне байланысты. Қызмет көрсету саласында кәсіпкерлік белсенділік индексі 48,0 деңгейінде қалыптасты (2020 жылғы қарашада - 48,7). Сонымен қатар, өнеркәсіп саласындағы кәсіпкерлік белсенділік 2020 жылдың қаңтарынан бастап алғаш рет оң аймаққа көшіп, 50,3 құрады (2020 ж. қарашада - 49,6)», - деді спикер.

Өңірлер тұрғысынан көрсеткіштер желтоқсан айында Қостанай, Маңғыстау және Шығыс Қазақстан облыстарында жақсарды. Индекстің айтарлықтай нашарлауы Ақтөбе және Батыс Қазақстан облыстарында байқалады.

Нақты сектор кәсіпорындары Қазақстанда бизнес жүргізу жағдайының жақсарғанын атап өтеді. Желтоқсан айында іскерлік ахуал индексі 4,2-ге жетті, бұл 2020 жылғы ең жоғары мән.

Желтоқсан айында сауалнамаға 452 кәсіпорын қатысты: құрылыс саласында - 64, өнеркәсіпте - 172, қызмет көрсетуде - 216.