Қазақстанда да интернет толық сөндіріле ме? – вице-министр жауабы

ҚР Цифрлық даму, инновациялар және аэроғарыш өнеркәсібі вице-министрі Асхат Оразбек Ресей жаһандық желіден ажыратылса, Қазақстандағы интернетке кедергі болуы мүмкін деген сұраққа жауап берді.

«Ресей жаһандық желіден ажыратылса, бұл бізге қалай әсер етеді? Біз интернетке Ресей арқылы қол жеткізіп отырмыз ғой» деп сұрады журналист.

Асхат Оразбек мұның қауесет екенін айтып, Қазақстан үшін болуы мүмкін тәуекелдерге қатысты пікір білдірді.

«Біз барлық тәуекелдерді қарастырдық, бірақ бүгінде Қазақстанда интернетке қатысты күрделі проблемалар күтілмейтінін түсіндік. Қазақстанда Ресей арқылы емес, әртүрлі түйіспелер бар. Яғни, Қазақстанда интернеттің толықтай жабылу қаупі жоқ. Сіздер оған уайымдамаңыздар» деді Оразбек.

Сондай-ақ, оның айтуынша, байланыс нашарламайды.

«Қытаймен байланыстарымыз бізге Еуропадан трафик алуға мүмкіндік береді» деп қосты ол.