Қазақстанда астық пен ұн экспортына шектеу енгізіледі

Қазақстанда 15 сәуірден бастап астық пен ұн экспортына шектеу енгізіледі. Ауыл шаруашылығының бірінші вице-министрі Айдарбек Сапаров елдегі астық пен ұнның көлемі ішкі қажеттілікті қамтамасыз ету үшін жеткілікті екенін айтты.

Сапаровтың айтуынша, ішкі нарықтағы тапшылықты болдырмау және ұн тартатын кәсіпорындардың жүктемесін азайту үшін шектеу шаралары қажет.

– Сыртқы сауда саясаты және Халықаралық экономикалық ұйымдарға қатысу мәселелері жөніндегі ведомствоаралық комиссия 2022 жылғы 1 сәуірден бастап 15 сәуір мен 15 маусым аралығында бидай мен ұн экспортына квота енгізу туралы шешім қабылдады. Бидай квотасының көлемі - 1 миллион тонна, ұнға - 300 мың тонна, - деді Сапаров ОКҚ онлайн-брифингінде.

Сапаровтың айтуынша, ішкі нарықтағы нақты жағдайды бағалау үшін министрлік ұлттық статистика бюросымен және жергілікті атқарушы органдармен бірлесіп өңірлердегі бидай қорларын түгендеу бойынша жұмыс жүргізіп жатыр.

– 7 сәуірдегі жағдай бойынша қор 118 мың тонна ұнды құрайды, оның ішінде тұрақтандыру қорында 10 мың тонна, «айналым схемасы» шеңберінде 22 мың тонна, өндірушілерде 48 мың тонна, қоймаларда шамамен 20 мың тонна және сауда объектілерінде 18 мың тонна бар. Көрсетілген көлем ішкі қажеттілікті қамтамасыз ету үшін жеткілікті. Сонымен қатар, «Азық-түлік корпорациясы» ресурстарында 800 мың тоннадан астам астық бар, олар қажет болғанда жағдайды тұрақтандыру үшін ішкі нарыққа жіберілетін болады, - деп толықтырды Айдарбек Сапаров.