Қазақстанда қант тапшылығы болмайды —Ауыл шаруашылығы министрлігі

11 наурыз күні таңертең Сауда және интеграция министрлігі импорттық қанттың 3 айға жететінін хабарлады.

ҚР Ауыл шаруашылығы министрлігі азық-түлік қауіпсіздігін қамтамасыз ету және ауыл шаруашылығы құрылымдарының үздіксіз жұмыс істеуін бақылауда ұстайтынын мәлімдеді.

Ведомствоның мәліметінше, елімізде 1,5 миллион тонна әлеуметтік маңызы бар азық-түлік өнімдерінің  қоры бар. Оның ішінде ұн – 145,1 мың тонна, қант – 47,6 мың тонна, күріш – 40,2 мың тонна, макарон өнімдері – 21,3 мың тонна және 1 млн тонна көкөніс өнімдері, т.б.

«Азық-түлік өндірісі тоқтамайды, қорлар жүйелі түрде толықтырылуда. Жарма, ұн, консерві және басқа да тауарларды өндіру үшін шикізат жеткілікті, ет және сүт өнімдерін өндіру үшін мал басы жеткілікті» делінген хабарламада.

Республикадағы астық және бұршақ дақылдарының қоры 10 млн тоннаны құрайды. Оның ішінде 8,1 млн тонна бидай, 1,2 млн тонна арпа, 157 мың тонна жүгері және 26 мың тонна қара бидай бар.

«Осылайша, республика ішкі нарықтың астыққа деген қажеттілігін өз өндірісі арқылы қамтамасыз етуге толық қауқарлы» дейді Ауыл шаруашылығы министрлігі.

Қоймада 47,6 тонна қант бар. Ауыл шаруашылығы министрлігі Агроөнеркәсіптік кешенді дамытудың 2021-2025 жылдарға арналған ұлттық жобасы аясында импортты алмастыру бойынша жүйелі жұмыстар жүргізіліп жатқанын баса айтты.