Қазақстанда 8 желтоқсаннан бастап қайта егуден өтуге болады – Цой

Кем дегенде алты ай бұрын вакцинаның толық курсын аяқтаған кез келген адам 8 желтоқсаннан бастап коронавирусқа қарсы ревакцинациядан өте алады, деп хабарлады денсаулық сақтау министрі Алексей Цой.

Бұған дейін Қазақстан халықты қайта егу әдісін пысықтаған болатын. 8 желтоқсаннан бастап екі доза егуді аяқтаған, сондай-ақ коронавирус жұқтырған барлық адамдар алты айдан кейін қайта вакциналауға жатады. Бүгінгі күні қайта егумен 44 мыңнан астам адам қамтылды.

«Біздің ғалымдар халықаралық тәжірибені зерттеді. Жалпы әлемде 6 айдан кейін қайта вакциналауды ұсынатынын көріп отырмыз. Сондықтан біз 9 айдан 6 айға ауыстырдық, яғни уақытты қысқарттық, өйткені ағзаны коронавирустың жаңа штамдарынан көбірек қорғау үшін иммундық жүйені ынталандыруға қажеттілік бар» деді Цой.

Журналистер министрге кез келген адам 8 желтоқсаннан бастап емханаға келіп қайта егуден өте ала ма деп сұрады.

«Иә, вакцинаның екінші дозасын алғанына 6 ай болған адамдар келіп, вакцина ала алады» деп қосты Денсаулық сақтау министрі.