Қазақстанда 300 миллиард теңгеден астам қаражат кімдерге бөлінген?

Еңбек және халықты әлеуметтік қорғау министрлігінің баспасөз қызметі таратқан ақпаратқа сүйенсек, 2020 жылғы қаңтар-қазан аралығында республикалық бюджеттен 242 миллиард теңгені мүгедектікке байланысты мемлекеттік әлеуметтік жәрдемақы төлеуге, 61 миллиард теңгені асыраушысынан айырылуы бойынша жәрдемақы төлеуге бөлінген.

Қазан айында бюджеттің 23,6 млрд теңгесі мүгедектікке байланысты мемлекеттік әлеуметтік жәрдемақы төлеуге, ал 6,2 млрд теңгесі асыраушысынан айрылу бойынша жәрдемақы төлеуге бағытталған.

Бірінші қарашадағы көрсеткіш бойынша ЕҚБА (Ерекше қажеттілігі бар адам - ORDA.kz ескертеді)- дың жәрдемақы алушылар саны 518,8 мың адамды құраса, асыраушысынан айырылғандардың жәрдемақы алушылар саны 145,7 мың адамға жеткен.

«2020 жылғы 1 қарашаға мүгедектігі бойынша мемлекеттік әлеуметтік жәрдемақының орташа мөлшері – 45 507 теңгені, асыраушысынан айрылу жағдайы бойынша мемлекеттік әлеуметтік жәрдемақының орташа мөлшері – 42 614 теңгені құрады», -делінген хабарламада.