Қазақстанда 23 университет жабылу алдында тұр ма? – БҒМ пікірі

ҚР Білім және ғылым министрлігі Қазақстанда 23 жоғары оқу орны жалған диплом бергені үшін жабылуы мүмкін деген ақпаратқа түсініктеме берді.

Бұл туралы Orda.kz хабарлайды.

Бұған дейін әлеуметтік желілерде жабылуы мүмкін деген университеттердің тізімі жарияланған еді.

Қазақстан Республикасы Білім және ғылым министрлігі Білім және ғылым саласындағы сапаны қамтамасыз ету комитеті төрағасының орынбасары Гүлжан Жарасова Білім министрлігі елдегі білім сапасын арттыру бойынша жүйелі жұмыс жүргізіп жатқанын атап өтті.

– Қазақстан Республикасы Білім және ғылым министрлігі Білім және ғылым саласындағы сапаны қамтамасыз ету комитеті университеттерде ата-аналар мен студенттердің шағымдары мен өтініштері негізінде тексерулер жүргізеді, - деп түсіндірді ол.

Комитет төрағасының орынбасары атап өткендей, кейбір жоғары оқу орындарында әр түрлі заң бұзушылықтар анықталады: оқыту үшін жағдайдың болмауы, сабақтың аздығы, оқытушылардың талаптарға сай келмеуі, ескірген инфрақұрылым және тағы басқалар.

– Тексерулерден кейін жоғары оқу орындарына қажетті жұмыстарды орындауға және білім сапасын арттыруға уақыт беріледі. Себебі қазір университеттер қажетті талаптарға сай болмаса, ертең білімсіз мамандар шығады, - деді Гүлжан Жарасова.

Бұл тізімді кімнің жасағанын ҚР Білім және ғылым министрлігі білмейді.

– Біз тағы да талапкерлерді және олардың ата-аналарын жоғары оқу орындарын таңдау мәселесіне жауапкершілікпен қарауға шақырғымыз келеді. Білім беру қызметінің сапасына, бағдарламалардың мамандандырылған аккредитациясының болуына, облыстар бойынша лицензиялардың болуына және жалпы университеттің беделіне назар аудару маңызды, – деді Гүлжан Жарасова