Қазақстанда 20 жыл құлдықта болған ресейлік сөзін қайтып алды

Қазақстанда 20 жыл құлдықта болғанын жариялаған ресейлік Алексей Котов өз мәлімдемесінен бас тартты. Бұл туралы Қарағанды ​​облыстық полиция департаменті хабарлады.

Еске салсақ, Қарағанды ​​облысы бойынша полиция департаментінің криминалдық полиция басқармасының қызметкерлері әлеуметтік желілерге жүргізген мониторинг барысында Қарағанды ​​облысы Шет ауданындағы Мұхтар қыстауында ер адамның өзін заңсыз ұстағаны туралы хабарлаған видеоны анықтаған болатын.

Бейнежазбада ер адам өзін Ресей Федерациясының Ярославль облысы Гаврилов-Ямский ауданы Горе-Грязь ауылының тумасы Алексей Александрович Котов деп таныстырған.

Бейнехабарлама бойынша қылмыстық іс қозғалды. Ақпаратты тексеру үшін тергеу-жедел тобы Шет ауданына барып, осы шаруа қожалығын, оның иелерін және Котовтың өзін тапты.

«Ресей консулдығы қызметкерлерінің қатысуымен жауап алынған Котов шаруа қожалығының аумағында өз еркімен болғанын және жұмыс істегенін, ұялы телефонды пайдаланғанын және фермадан кез келген уақытта кетуге мүмкіндігі болғанын айтты. Видеоны жариялаудағы жалғыз мақсаты – үйіне оралу болған.  Котов өз мәлімдемесінен бас тартып, шаруа қожалығының иесіне еш шағымы жоқ екенін алға тартты» делінген полиция хабарламасында.

Қазір Ресейдің Қазақстандағы елшілігі Алексей Котовты Нұр-Сұлтанға алып кеткен, сол жерден ол үйіне жөнелтіледі.