Оливер Стоун: Қазақстан - әлемнің болашағына айналатын ел

Нұр-Сұлтанда «Qazaq: алтын адамның тарихы» атты Нұрсұлтан Назарбаев пен Қазақстан туралы деректі фильмнің премьера алдындағы көрсетіліміне арналған баспасөз конференциясы өтті.

Бұл туралы Orda.kz хабарлайды.

Конференцияға атқарушы продюсер Оливер Стоун, режиссер Игорь Лопатенок, продюсер Игорь Кобзе,  продюсер Вера Томилова қатысты.

Конференцияның басында Оливер Стоун өзінің тек продюсер екенін айтып, фильмнің режиссері Игорь Лопатенокты таныстырды. Фильм түсіру идеясы 2015 жылы пайда болған, ал негізгі жұмыстар 2019 жылдың желтоқсанында басталғаны айтылды.

– Фильммен жұмыс 19 айға созылды. Содан кейін біз бүкіл ел бойынша экспедицияға шықтық, бірақ коронавирусқа байланысты экспедиция тоқтатылды, - деді Игорь Лопатенок.

Баспасөз конференциясы кезінде Стоун Қазақстан және қазақ халқы туралы айтты.

– Бұл менің Қазақстанға алғашқы сапарым емес, мен бұл елде екі рет болдым. Америкада Қазақстанды білмеуі мүмкін, бірақ бұл әлемге маңызды ел және бұл әлемнің болашағы. Американдық сарапшылар осыны түсінеді және АҚШ-тың Қазақстан Республикасымен одақтасқанын қалайды, - деді ол.

Конференция барысында фильмнің бюджеті туралы сұрақ қойылды. Лопатенок мемлекет ақшасы жоқ екенін атап өтті. Алайда фильм кімнің есебінен түсірілгеніне жауап бермеді.