Қазақстан вакциналау бойынша 86 елдің ішінде 58 орында

Қазақстанда халықтың үштен бір бөлігі екпе алуға қарсы.

Бұл туралы Orda.kz finprom.kz-ке сілтеме жасап хабарлады.

Елдегі вакциналау деңгейі Азиядағы және бүкіл әлемдегі ең нашар көрсеткіштерге жатады.

Қазақстан 86 елдің ішінде 58-ші орында тұр, жалпы халықтың 17,76%-ында кем дегенде вакцинаның бір компонентін алған. Сонымен қатар орта есеппен әлемде вакцина деңгейі 23,52%, Азияда 23,74% құрады.

Көрсеткіш бойынша көшбастап тұрған – Мальта, Исландия және Мэн аралы. Онда вакцинаның кем дегенде бір дозасын қабылдаған адамдардың үлесі халықтың 74%-дан 81%-на дейінгі аралықта.

Demoscope Express мониторинг бюросы халық арасында жүргізген сауалнамаға сәйкес:

Пандемия басталғалы бері респонденттердің 34%-ы вакцинаға деген көзқарасын өзгерткен, 9% -ы мүлде қарсы, 30%-ы әрдайым вакцинаны қолдайды және 14%-ы тек бастапқыда қарсы болған.

Сонымен қатар, респонденттердің 14%-ы вакцинацияланған, 26%-ы болашақта екпе алады, 32%-ы екпе алғылары келмейді. Вакцинаны салдырғысы келмейтіндердің арасында 14% қарсы көрсетілімдері бар, 4% салдардан қорқады, 3% қазірдің өзінде ауырып, вакцинаны пайдасыз деп санайды.

Сауалнамаға қатысушылардың 62%-ы ресейлік Sputnik-V вакцинасына көбірек сенеді, 12%-ы қазақстандық QazVac, 2%-ы Pfizer және AstraZeneca-ны ең жақсы вакциналар деп атады, халықтың тағы 1% қытайлық Sinovac Biotech-ке дауыс берді.

Шілде айының басында Қазақстанда ауру саны 428 мыңнан астам адамды құрады, 4 400 адам қайтыс болды. 3,5 млн адам бірінші компонентпен, 2,1 млн адам екінші компонентпен вакцинацияланды.

Әлемде дәл осы күні, worldometers.info статистикасы бойынша, АҚШ-та, Үндістанда және Бразилияда ауру өршіп тұр.