Қазақстан Украинаға қарсы соғысқа қатысудан бас тартты – БАҚ

Қазақстан Украинадағы соғысқа қатысуға өз әскерін жіберуден бас тартты. Сондай-ақ, бұған дейін жазғанымыздай Қазақстан ДХР мен ЛХР-н мойындаудан да бас тартқан болатын.

Бұл туралы америкалық NBC телеарнасы хабарлады.

Ресейдің дәстүрлі одақтасы болған Қазақстан Құрама Штаттардың қолдауына ие болды.

«Біз Қазақстанның ДХР және ЛХР-ды мойындамайтыны туралы мәлімдемесін құптаймыз. Біз сондай-ақ Қазақстанның өз күштерін Путиннің Украинадағы соғысына тартудан бас тартуын құптаймыз» делінген АҚШ Ұлттық қауіпсіздік кеңесінің мәлімдемесінде.

Осы уақытта Киев қаласының көшелерінде жарылыстар мен шайқастар жалғасуда.

Украина президенті Владимир Зеленский бұл соғысты тоқтату үшін әркім қолынан келгенінің бәрін жасау керек екенін атап өтті.

UNIAN тілшісінің хабарлауынша, бұл туралы ол Президенттің Telegram-арнасында жарияланған үндеуінде айтты.

«Бұл соғысты тоқтату үшін әркім қолдан келгеннің бәрін жасауы керек. Агрессияның әрбір күні қалыпты өмірді бұзады. Украинада ғана емес, Ресейде, Еуропада, әлемде. Еуропалықтар мұндай текетірес жақындаған кезде өмір сүрудің қандай болатынын әлі түсінбейді» деді Зеленский.