Қазақстан ҰҚШҰ құрамында Донбасқа әскер жібере ме - Сыртқы істер министрінің жауабы

Қазақстанның Сыртқы істер министрі Мұхтар Тілеуберді Қазақстан ҰҚШҰ құрамында Донбасқа өз әскерін жіберуге міндетті емес деп сендірді.

«Бұл мүмкін емес. Өздеріңіз білесіздер, ҰҚШҰ жарғысы әскери не бітімгершілік күштерді пайдалануды қатаң шектейді. Оларды ҰҚШҰ кеңістігінде ғана пайдалануға болады» деді министр.

ҰҚШҰ-дың Донбасқа кез келген миссия бойынша әскер жіберуге құқығы жоқ, өйткені ДХР мен ЛХР ҰҚШҰ блогына кірмейді.

ҚР СІМ айтуынша, Ресей президенті ДХР мен ЛХР тәуелсіздігін тану туралы жарлыққа неге қол қойғанын да түсіндірді.

«Біріншіден, Батыс пен Ресей арасында қауіпсіздік жүйесіне қатысты келісімдер жоқ екені белгілі. Өздеріңіз білетіндей, ресейлік тарап Ресей мен АҚШ арасындағы келісімдер жобаларын, сондай-ақ Ресей мен НАТО арасындағы келісім жобасын жіберген. Бірақ бұл келісімдер бойынша қазіргі уақытта түсіністікке қол жеткізілген жоқ.

Екіншіден, Нормандия форматына қатысушылардың Минск келісімдерін жүзеге асыруға қабілетсіздігі және өзара түсіністікке жете алмағаны анық. Бұл да себептердің бірі.

Үшінші себеп, біз ДХР мен ЛХР-дағы гуманитарлық дағдарыс туралы айтып отырмыз. Босқындар легі қазір бұл республикалардан Ресейге қарай бет алуда» деді Мұхтар Тілеуберді.

Қазақстан ДХР мен ЛХР-ды тани ма?

Ресми түрде Қазақстанның Донецк және Луганск халық республикаларын тану туралы шешімі әлі тұжырымдалған жоқ, бұл бойынша жұмыс жүргізілуде. Алайда Қазақстан Сыртқы істер министрлігінің басшысы біздің мемлекет бұл республикаларды мойындамайтынын айтып та үлгерді.

«Қазақстанның Донецк және Луганск халық республикаларын тану мәселесі талқыланбайды. Біз халықаралық құқық негіздері мен БҰҰ жарғысының негізгі қағидаттарына сүйенеміз» деді Мұхтар Тілеуберді үкімет отырысында.

Донбастағы жағдайдың шиеленісуі

Мәскеу уақытымен 21 ақпан күні кешке Ресей президенті Владимир Путин Донецк Халық Республикасы мен Луганск Халық Республикасының тәуелсіздігін мойындау туралы жарлықтарға қол қойды. Өзін-өзі жариялаған мемлекеттердің басшыларымен достық және өзара көмек, оның ішінде әскери көмек туралы шарттарға қол қойылды.

Бұл Донбастағы ауқымды шиеленіс кезінде болды, соның салдарынан ДХР мен ЛХР әйелдерді, қарттарды және балаларды Ресейге жаппай эвакуациялау, сондай-ақ 18 бен 55 жас аралығындағы ер адамдарды жұмылдыру туралы хабарлады.