Қазақстан әртістері Токиодағы Олимпиада құрамасына ән арнады

Токио Олимпиадасында бақ сынайтын Қазақстан құрамасына арналған «Арнау» әні шырқалды.  Спортшыларға жігер мен рух беретін бейнебаяннан Роза Рымбаева, композитор Ренат Гайсин, Ninety One, Марсель, Әли Оқапов, Айдана Меденова, Қарақат Башанова, Дина және Мәди Сыздықовты көруге болады.  

Әнге  негіз ретінде Ұлттық Олимпиада комитетінің әнұраны алынды, музыкасын  Ренат Гайсин,  мәтінін Мирас Қалдымұрат жазған.

Әнұранның қайырмасы олимпиадашыларға арнау ретінде шырқалды. Ән арманға қол жеткізу үшін алға ұмтылуға жігер беріп, спортшылар рухын көтереді деген сенімге толы.  

Әртістер де, барша қазақстандықтар да Токиоға аттанған отандық спортшыларға жеңіс туын желбіретуді тілейді. Алға, Қазақстан! Қазақстандық спортшыларға Олимпиада сайтында  жанкүйер бола аласыз. Сайт жасаушылар әлемнің түкпір-түкпіріндегі жанкүйерлер үшін бірегей интерактивті «фан-зона» ойлап тауып, іске қосқан.