Қазақстан ресейлік «Лукойлмен» бірге мұнай игереді

Ресейлік «Лукойл» мен қазақстандық «ҚазМұнайГаз» Каспий теңізінің Қазақстан секторындағы «Қаламқас-Теңіз» ірі жобасы бойынша негізгі қағидаттар туралы міндетті келісімге қол қойды. Бұл туралы «Лукойл» компаниясының президенті Вагит Алекперов айтты.

ТАСС ақпараты бойынша, бұған дейін Қазақстан президенті Қасым-Жомарт Тоқаев «Қаламқас-Теңіз» мұнай кен орнын игеруге кірісетінін, бұл жобаның серіктесі «Лукойл» болатынын айтқан.

«Лукойл» Қазақстандағы бірнеше ірі жобаларға қатысады. Осылайша, әлемдегі ең ірі мұнай-газ конденсатты кен орындарының бірі «Қарашығанақ» жобасының 13,5%-ы және «Теңіз» жобасының 5%-ы компанияға тиесілі. «Лукойлға» Ресей мен Қазақстан аумағындағы жалғыз жеке магистральдық құбыр желісі - Каспий құбыр консорциумының 12,5%-ы тиесілі.

Бұдан басқа, 2019 жылы «Лукойл» Каспий теңізінің қазақстандық секторы акваториясының Жеңіс блогында көмірсутектерді барлау және өндіру келісімшартына қол қойды. Оған компанияның 50%-ы тиесілі. Осы жылдың жазында «Лукойл» қазақстандық «Қазмұнайгазбен» «Әл-Фараби» (бұрын i-P-2 деп аталған) бірлескен жобасында 49,99% сатып алу туралы келісімге қол қойды.