Қазақстан-Ресей шекарасында жүк көліктерінің кезегі  жоқ - Сауда министрлігі

ҚР Сауда және интеграция министрі жүк көліктерінің шекарада жиналып қалғаны туралы ақпарат шындыққа жанаспайтынын мәлімдеді.

— Сіздерге Қазақстан-Ресей шекарасындағы тауарлардың жинақталуына қатысты жағдай туралы хабардар еткім келеді. Маштаково-Сырым шекара бекеттерінде Қазақстанға кіру үшін көптеген жүк көліктері жиналып қалды. Ал Ресей де, Қазақстан да тауарды өткізбей жатыр деген ақпарат бұған дейін де болған. Алайда бұл ақпарат шындыққа жанаспайды, - деді ҚР Премьер-Министрінің орынбасары, Сауда және интеграция министрі Бақыт Сұлтанов.

Оның айтуынша, соңғы бірнеше аптадағы ауа райының қолайсыздығына байланысты біраз қиындықтар туындаған. Бір жерде тіпті электр қуаты да өшіп қалған. Бірақ қазір жолдар ашылып, тазартылды, көліктердің өтуі әдеттегідей жүріп жатыр.

— Ол аумақта 10 күнге жуық қарлы боран соғып, көктайғақ салдарынан жолдар жабылды. Ауа-райының қалыпқа келуімен жолдардың ашылуын күтіп тұрған жүк көліктерінің барлығы бірден Ресейдің Маштаково ПБ  кіреберісіне келіп, көп шақырымдық кезек  қалыптасты. Оған қоса, 16-17 наурызда болған қарлы боран кезінде Қазақстанның «Сырым» шекара заставасында электр жарығы үзілген. Қазақстан тарапынан тауардың кешігуінің осындай себептері орын алды, - деп түсіндірді ол.

Министр керісінше, шекарадан тауарларды өткізу процесін жеңілдету мақсатында шекара бекетінің аумағына ветеринарлық инспекторларды кіргізу мүмкіндігі пысықталып жатқанын түсіндірді. Бұл жүргізушілерге ветеринарлық бақылау бекеттеріне бұрылмай, шекаралық сауданы жылдамдатады деген пікір бар.

— Мен трансшекаралық сауда жағдайын қадағалап отыратыныма және ресейлік әріптестерімізбен үнемі байланыста екенімізге тағы да сендіргім келеді. Қандай да бір қиындықтар туындаған жағдайда, біз оларды жою шараларын жедел қабылдаймыз, - деді Сұлтанов.

Ал, Орда.kz бір күн бұрын жазған бидай тиелген 17 жүк көлігі Ресейден келген Құлынды бекетінде әлі тұр. 15 наурыздан бастап көрші республикада бидай экспортына тыйым салынғандықтан, 13 наурыздан бастап қазақстандық тасымалдаушылар шекарадан өткізілмеді.