Қазақстан Ресей мен Украина арасындағы соғысқа әскер жібере ме? – ресми жауап  

Сенат төрағасы Мәулен Әшімбаев Ресей-Украина жанжалын бейбіт жолмен шешкен жөн екенін айтты.

Парламент сенаты төрағасының айтуынша, Ресей мен Украина қақтығысында Қазақстан бейтарап ұстанымда қалады. Әшімбаев Қазақстан бұл жанжалдың саяси жолмен шешілгеніне мүдделі екенін айтты.

«Ресей жақын серіктесіміз деп үнемі айтамыз. Біз кімді қолдауымыз керек?» деп сұрады журналистер.

– Біздің ұстанымымызды бірнеше рет нақты айттым. Ресей де, Украина да бізге жақын әрі бауырлас елдер. Біз бұл жанжалдың бейбіт жолмен шешілуіне мүдделіміз. Қазақстан тарапынан да қажетті шаралар жүзеге асады, - деді Сенат спикері.

Сондай-ақ, Сенат төрағасы екі ел арасындағы қақтығысқа «Қазақстан әскер жібере ме» деген сұраққа жауап берді.

– Жалпы, бұл жағдайда мынадай мәселе маңызды: Қазақстан Ұжымдық қауіпсіздік шарты ұйымының (ҰҚШҰ) мүшесі. Осыған байланысты сұрақ туындайды: қақтығыс аймағына қазақстандық бітімгерлер жіберілуі мүмкін бе? Мұнда біздің позиция анық. БҰҰ жарғысына және басқа да құжаттарға сәйкес, Қазақстан ҰҚШҰ елдерінен тысқары жерлерге бітімгерлерді тек БҰҰ мандатына сәйкес қана жібере алады. Ұжымдық қауіпсіздік туралы шарттың жарғысына сәйкес ҰҚШҰ елдерінің бітімгершілік күштері, ҰҚШҰ елдері аумағында ғана қолданылады. Қақтығыс аймағы ұйымға қатысушы елдер аумағына кірмейді. Сондықтан осы шарттарға, ратификацияланған келісімдерге сәйкес, ҰҚШҰ шеңберіндегі бітімгерлерді қақтығыс аймағына жіберуге құқығымыз жоқ, - деп түсіндірді Әшімбаев.