Қазақстан-Ресей арасындағы жүк транзиті мәселесі талқыланды

ҚР Ауыл шаруашылығы министрінің бірінші орынбасары Айдарбек Сапаров Мәскеу қаласына жұмыс сапары аясында РФ Ауыл шаруашылығы министрінің орынбасары Сергей Левинмен кездесті.

ҚР Ауылшаруашылығы министрлігі делегациясының 5-8 қазан аралығында Ресейде өткен «Алтын күз-2021» ресейлік агроөнеркәсіптік көрмесіне барды. Кездесу барысында тараптар екі ел арасындағы АӨК саласындағы тауар айналымы мәселелерін талқылады, деп хабарлайды Orda.kz.

 2021 жылдың жеті айында Қазақстан мен Ресей арасындағы ауыл шаруашылығы өнімдерінің тауар айналымы $1,4 млрд-тан асты, бұл 2020 жылдың осы кезеңімен салыстырғанда 11,4%-ға артық.

Келіссөзде Айдарбек Сапаров Ресей Федерациясымен шекарада жүктерді тексеру ісін  жеделдетуді ұсынды. Бұған дейін де екі ел арасындағы өңіраралық ынтымақтастық форумда Қасым-Жомарт Тоқаев шекарада жүк тасымалдау мәселесін көтерген болатын.

— Бұл бізге АӨК өнімдерінің қазақстандық экспортын ұлғайту бөлігінде тауар айналымын өсіруге мүмкіндік береді. Аталған шараны жүзеге асыру үшін өзара тығыз іс - қимыл жасау және жүктерді тасымалдау кезінде туындайтын проблемаларға жедел әрекет ету қажет, - деді Айдарбек Сапаров.

Ресей тарапы шекарадан өту кезінде проблемалар туындағанда жедел әрекет ету мақсатында экспорттаушы-кәсіпорындардың тізілімімен алмасуды ұсынды.

«Алтын күз-2021» - бұл сала мамандары үшін ауқымды іскерлік бағдарламаны қамтитын, ресейлік ауылшаруашылық тауар өндірушілерінің көрмесі. Биылғы жылы көрме аграрлық сектор, ғылым мен инновацияның өзекті тақырыптарына арналды.