Қазақстан мен Өзбекстан шекаралық кеден бекеттерінің өткізу қабілеті артады

Қазақстан мен Өзбекстан шекаралық кеден бекеттерінің өткізу қабілеті артады, деп хабарлайды Өзбекстан Республикасы кеден комитетінің сайты.

«Кездесуге екі елдің кеден қызметтерінің салалық және аумақтық департаменттерінің, сондай-ақ шекаралық кеден бекеттерінің басшылары қатысты. Кездесу барысында тараптар шекаралық кеден бекеттерінің өткізу қабілетін арттырудың өзекті мәселелерін, келешегі бар бірлескен міндеттерді, кеден бекеттерін реконструкциялау мен жаңғыртуды талқылады, сондай-ақ өзбек-қазақ шекарасы арқылы өтетін жүргізушілер мен азаматтарға қолайлылық жасау мәселелерін қарастырды» делінген хабарламада.

Бүгінгі таңда өзбек-қазақ шекарасында 10 кеден бекеті мен 2 кеден нүктесі жұмыс істейді, олар күніне орта есеппен 2700 көлік пен 7200 жолаушы өткізеді.

Кездесу нәтижесінде қазақстандық тараппен екіжақты ынтымақтастықты одан әрі дамыту, кеден бекеттерінде кептелістердің пайда болуына жол бермеу, сондай-ақ кеден бекеттерін реконструкциялау және жаңғырту шаралары белгіленді.