Қазақстан мен Өзбекстан арасындағы жолаушылар тасымалы жандана түспек

Әңгіме екі жыл бұрын пандемияға байланысты үзілген теміржол және автобус тасымалы туралы болып отыр.

Өзбекстан мен Қазақстан билігі екі жыл бұрын коронавирустық пандемияға байланысты үзілген теміржол және автобус жолаушылар тасымалын қайта қалпына келтіреді.  Бұл туралы Өзбекстан-Қазақстан тиісті жұмыс тобының кезекті отырысында айтылды. Оны Өзбекстан көлік министрлігінің баспасөз қызметі мәлімдеді.  

«Тараптар эпидемиологиялық талаптарды жеңілдету және жерүсті көлігімен жолаушыларды тасымалдауды қалпына келтіру үдерісін жеделдету маңыздылығын қуаттады» делінген министрлік хабарламасында.

Жиында мамандар Түркістан-Шымкент-Ташкент жүрдек темір жолы мен Үшқұдық-Қызылорда көлік дәлізінің инфрақұрылымдық жобаларын қарастырды.

Сонымен қатар, Өзбекстан мен Қазақстан аумақтарында әуе қозғалысы бойынша жаңа әуе бағыттарын енгізу мәселесі талқыланды.

«Осы жаңа бағыттарды енгізу арқылы ұшақтардың ұшу уақытын айтарлықтай қысқартуға қол жеткізуге болады, бұл өз кезегінде жаһандық экологиялық жағдайға оң әсерін тигізеді, жанар-жағармайды үнемдейді және аймаққа қосымша пайдаланушыларды тартады» делінген хабарламада.

Covid-19 таралуына байланысты 2020 жылдың наурызында елдер арасындағы жолаушылар тасымалы тоқтатылды. 2020 жылдың қыркүйегінде Өзбекстан мен Қазақстан арасында әуе қатынасы қайта жанданды. 2021 жылдың мамырында Ташкент теміржол рейстерін кезең-кезеңімен қалпына келтіруді бастау ұсынысымен Нұр-Сұлтанға жүгінді.