Қазақстан мен Қырғызстан арасында тауар айналымы азайды

Қырғызстан мен Қазақстанның экономикасы пандемия салдарынан шығынға ұшырап жатыр. Бұл туралы Сауда және интеграция министрі Бақыт Сұлтанов мәлімдеді.

Бұл туралы Orda.kz ҚазАқпаратқа сілтеме жасап хабарлады.

– Министрліктен алған ақпаратқа сәйкес, Қазақстан мен Қырғызстан арасында былтыр тауар айналымы 2019 жылмен салыстырғанда 15,3%-ға төмендеген. Экспорт 9,9%-ға, импорт 26%-ға кеміген. Ал сауда балансы 20,6 млн АҚШ долларына өскен. Оған не себеп болды? – деп сұрады депутат Бауыржан Қаниев Сенаттың жалпы отырысында.

Оған Сауда және интеграция министрі Бақыт Сұлтанов жауап берді. Оның айтуынша, пандемия мен коронадағдарыс екі елдің экономикасын шығынға батырған.

– Жалпы біздің экспортымыз да, импортымыз да төмендеді. Бірақ импорттың төмендеуі көбірек болды. Экспорт 62 млн долларға, ал импорт 92 млн-ға қысқарды. Сондықтан арадағы айырмашылық сауда балансының жақсаруына тікелей әсер етіп тұр, - деп түсіндірді министр.

Төмендегі тауар экспорты шығынға батты:

• бидай 18 млн долларға
• темекі өнімдері 11,5 млн долларға
• металл конструкциялар 6 млн долларға.

Ал импорт бойынша:

• былғарыдан жасалған аяқ киімдер 15 млн долларға
• сәндік косметика 12 млн долларға азайған.