Қазақстан мен Ресей әскери ынтымақтастық туралы келісімге келді

Мәжіліс спикері Нұрлан Нығматулиннің төрағалығымен өткен жалпы отырыста палата депутаттары ратификациялық заң жобасын – Қазақстанның Ресеймен әскери ынтымақтастық туралы келісімін мақұлдады,

parlam.kz мәліметіне сәйкес, шартты ратификациялау мемлекеттердің қауіпсіздігін қамтамасыз ету және сыртқы сын-қатерлер мен қауіп-қатерлерге қарсы тұру мүддесінде Қазақстан мен Ресейдің әскери ведомстволары арасындағы ынтымақтастықты дамытуға мүмкіндік береді. Шарт жедел және жауынгерлік даярлық, бітімгершілік қызмет, әскери білім мен ғылым, әскерлердің (күштердің) қызметі және оларды жан-жақты қамтамасыз ету, екіжақты нормативтік құқықтық базаны жетілдіру, мәдениет, спорт сияқты салаларда әскери ынтымақтастықты жүзеге асыруға мүмкіндік береді.

Шарттың ратификациялануымен 1994 жылғы 28 наурыздағы Қазақстан Республикасы мен Ресей Федерациясы арасындағы әскери ынтымақтастық туралы қолданыстағы шарттың қолданылу мерзімі аяқталады. Палата жалпы отырыста «Қазақстан Республикасындағы Адам құқықтары жөніндегі уәкіл туралы» заң жобасына Сенаттың түзетулерін де қарады. Сонымен қатар, Мәжіліс депутаттары жаңа заң жобаларын қабылдады.

Жалпы отырыс соңында мемлекеттік органдарға бірқатар депутаттық сауалдар қойылды. Сұрақ қойған депутаттар қатарында Қ.Иса, С.Ерубаев, Қ.Ержан, Г.Нұрымова, Ю.Ли, А.Қоңыров, Ғ.Әміреевтер бар.