Қазақстан – әлі құлдық санадан құтылмаған ел! – депутат

Мәжіліс депутаты Қазыбек Иса Ресей президенті Владимир Путин Қазақстанды «орыс тілді ел» деп атағанына пікір білдіріп, мемлекетік тіл туралы жаңа заң қабылдауға шақырды.

Депутат өз пікірімен Facebook парақшасында бөлісті.

«Қазақстан қандай ел?! «Қазақстан – орыс тілінде сөйлейтін ел» – деген сөз  – «Қазақстан – әлі құлдық санадан құтылмаған ел» – деген сөз?!» деп депутат сұрақ қоюда.

Сонымен қатар, тек Қазақстанда тек орыс тілінде сөйлейтін адамдарды сынға алды.

«Ресей Президенті Путиннің шындығы бар  бұл сөзін біздің биліктегі мемлекеттік тілін білмей-ақ, Ресей тілінде сөйлейтіндер  «бізді мақтап жатыр» деп мәз болып, жуып жатқан болар…

Иә, құл ғана қожайын тілінде сөйлеуге құмар болады…» делінген хабарламада.

Қазыбек Иса елде мемлекеттік тіл туралы заң қабылдау керектігін алға тартты.

«Осы біз Тәуелсіздіктің 30 жылдығын тойлаған жоқпыз ба?!.

Бұл масқарадан құтылудың бір-ақ жолы бар – мемлекеттік тілді міндеттейтін мемлекеттік тіл туралы заң қабылдау керек!» делінген депутат жазбасында.

Еске салсақ, Ресей Федерациясының басшысы Владимир Путин жыл сайынғы үлкен баспасөз мәслихатында Қазақстанды «орыс тілді ел» деп атады. Оның айтуынша, Қазақстанда орыс тілінде оқытатын мектептер мен ЖОО филиалдары салынып жатыр.

Сонымен қатар, Ресей президенті Владимир Путин өзінің жыл сайынғы үлкен баспасөз мәслихатында Нұрсұлтан Назарбаев пен Қасым-Жомарт Тоқаевтың бейресми саммитке келуін күтетінін мойындады.