Қазақстан дәрігерлері ЭКГ нәтижесін қашықтан оқитын бағдарлама жасады

Отандық дәрігерлер ІТ мамандарымен бірлесіп бірегей бағдарлама жасап шықты. Аталған қосымша дәрігерлерге электрокардиограмма нәтижесін қашықтан оқуға мүмкіндік береді екен.

 Енді алыс ауыл  тұрғындары да дәрігер кеңесін ала алады. Дәрігерлер жасаған отандық бағдарлама мамандардың жұмысын анағұрлым жеңілдетеді деп күтілуде. Кардиолог пен  диагностика дәрігерлері науқастың электронды кардиограммасын  қашықтан оқи алады.

— Мұндай жобалар медициналық технологиялар мен теледиагностиканы жасай алатынымызды көрсетуге мүмкіндік берді.  Осы уақыт ішінде ғалымдар мен команда құрамы жабдықтар сатып алып, өздерінің барлық негізгі жұмыстарын сынақтан өткізді. Бұл өте пацдалы дүние болмақ.  Электронды кардиограмма аппараттары көп, бірақ маман тапшы. Ал бұл қосымша бағдарлама зерттеу нәтижелерін электронды форматқа аударуға және оларды сақтауға мүмкіндік береді. Әрі ғаламтор болса,  кез-келген дәрігер ашып нәтижені оқи алады, - дейді «Ғылым қоры» АҚ Басқарма төрағасы Арын Орсариев.

Бағдарлама әзірлеушілері ЭКГ суреттерімен жұмыс істеу ыңғайлы болу үшін мобильді қосымша жасаған. Онда «толқындардың»  ұзындығы мен енін, олардың арасындағы қашықтықты өлшеуге болады.

 — ЭКГ нәтижесі өте жылдам шығады. Қымбат жабдықты сатып алудың қажеті жоқ. Өйткені бұл платформа кез-келген ЭКГ түрімен біріктіріледі. Біз халықаралық нарыққа шығуды жоспарлап отырмыз. Бірінші көршілес  елдермен ынтымақтастық орнату көзделген. Болашақта бұл ультрадыбыстық, компьютерлік томография аппараттары сияқты зерттеулердің сандық форматына аударылуы мүмкін, - дейді интервенциялық хирург Нияз Малаев.

  «Ғылым қоры» жетекшілік ететін жобалардың  155-і сәтті жүзеге асып,  мемлекет қазынасына 41 миллиард теңге пайда әкелген.