Қазақстанға әкелінген Армения көліктерін тіркеу мерзімі ұзартылды

Қазақстандықтардың Армениядан әкелген көліктерін тіркеу мерзімі ұзартылды, деп хабарланды Polisia.kz сайтында. 

Ішкі істер министрлігі Мемлекет басшысының тапсырмасын орындау барысында  Армения Республикасының уәкілетті органдарында Қазақстан азаматтарына тіркелген және 2020 жылғы 1 ақпанға дейін Қазақстанға әкелінген көлік құралдарын тіркеу бойынша жұмыс жалғасуда. 

Бұған дейін  1 мыңнан астам автокөлік иелеріне  көліктерін тіркеуге немесе оларды елден тыс жерлерге әкетуге мүмкіндік бермеген бірқатар объективті себеп бар. Оған күрделі эпидемиологиялық жағдайға және карантиндік шектеулердің ұзаққа созылуына байланысты мемлекеттік шекараны кесіп өту шектеулері салдарынан автокөлікті Арменияға кері әкету мәселелері  себеп болуда. 

Мәселенің екінші жағы -  аккредиттелген зертханалар барлық өңірде жоқ, сондықтан кейбір автокөлік иелері қайта жабдықталған автомобильдерді дер кезінде сынақтан өткізе алмады. 

– Сонымен қатар қазір Армения Үкіметімен келісім бойынша Қазақстанда тіркеуден өткен осындай автомобильдердің иелерін Армениядағы салық міндеттемелерінен босату туралы үкіметаралық келісім ішкі және мемлекетаралық рәсімдерден өтуде. Бұл шаралар автокөлік иелері үшін (Армения мен Қазақстанда) қосарланған салық салуды болдырмауға бағытталған. Мемлекеттік органдар Үкіметтің аталған шешімдерін іске асыру бойынша тиісті шаралар қабылдайтын болады, делінген хабарламада.

Осындай себептермен  Армения Республикасында тіркелген және біздің елге 2020 жылғы 1 ақпанға дейін әкелінген көлік құралдары иелеріне  автомобильдерін есепке қою мәселелерін шешу үшін қосымша уақыт берілді. Осы уақытқа дейін  тіркеу шарттарына сәйкес 20 мыңнан астам автомобиль есепке алынған.