Қазақстан 2025 жылы телефон кодын өзгертеді

Қазақстан 2025 жылдан бастап жаңа +997 телефон кодына көшеді, деп хабарлады ҚР Цифрлық даму, инновациялар және аэроғарыш өнеркәсібі министрлігінің телекоммуникациялар комитеті.

Комитеттің мәліметі бойынша, Қазақстан 2025 жылдың қаңтарынан бастап +997 телефон кодын енгізу туралы жоспар әзірленіп, бекітіліп қойған.

Қазақстан жаңа кодты былтыр резервке алып қойған. Халықаралық электр байланысы одағының ұсынымдарына сәйкес, қолданыстағы кодты жаңа +997 кодымен бірге екі жыл бойы қатар пайдалануға болады. Ал халықаралық интернет-платформаларды жаңа телефон кодтарына көшіру жұмыстары қосымша иелерімен бірге пысықталады.