Қазақ елі бауырлас түрік халқына көмек беруге дайын

Қазақстан президенті Қасым-Жомарт Тоқаев Туркия президенті Режеп Ердоғанға елдегі табиғи апатқа қарсы күресте жігер беретін сөздер айтты.

Қазақстан президенті Қасым-Жомарт Тоқаев Түркиядағы алапат өртке байланысты Режеп Тайип Ердоғанға жеделхат жолдады. Бұл туралы мемлекет басшысының баспасөз хатшысы Берік Уәли хабарлады.

— Мемлекет басшысы Қасым-Жомарт Тоқаев Түркияда болған алапат өрт салдарынан елдің экономикасы мен туристік базасына орасан зор шығын келгеніне және азаматтардың денсаулығына ауыр зардабын тигізгеніне байланысты Түркия президенті Режеп Тайип Ердоғанға ниеттестік білдірген жеделхат жолдады, - деп жазды Уәли.

Тоқаев  жеделхатында бауырлас түрік халқына гуманитарлық көмек көрсетуге дайын екенін білдіріп, президент Режеп Ердоғанға елдегі табиғат апатына қарсы күресте сәттілік тіледі.

Түркияда соңғы бірнеше күнде орман өрті өршіп тұр. Кеше Адана (Пос ауданы), Анталья (Манавгат, Аксеки, Газипаша), Мугла (Мармарис, Кёйджегиз), Мерсин (Айдынджик, Силифке), Османие (Кадирли) аймақтарында оншақты өрт ошағы сөндіріліп жатқаны белгілі болды.

Өрт салдарынан алты адам қаза тауып, 180-нен астамы зардап шекті. Өрт болып жатқан аймаққа жақын демалып жатқан туристер қауіпсіз жаққа көшірілді.