«Қазақ аруы – 2021» байқауының жеңімпазы анықталды

Алматыда продюсер Баян Мақсатқызының ұйымдастыруымен жыл сайын өткізілетін «Қазақ аруы – 2021» байқауы өз мәресіне жетті. Әр өңірден таңдалған  арулар биыл Ғ.Мүсірепов атындағы Қазақ мемлекеттік академиялық балалар мен жасөспірімдер театрынының сахнасында өнер көрсетті.

Бұл туралы ақпарат Баян Алагөзованың Instagram-дағы парақшасында пайда болды.

Әділқазылардың шешіміне сәйкес «Қазақ аруы – 2021» байқауында бас жүлдені иеленген – Аманжолова Аружан. Ақтөбелік бойжеткен 22 жаста. Әл-Фараби атындағы Қазақ Ұлттық Университеті журналистика факультетінің 2021 жылғы түлегі. Қазіргі таңда «Aqtóbe» телеарнасында «Қайырлы таң, Ақтөбе!» бағдарламасының жүргізушісі.

Жоба продюсері Баян Мақсатқызының парақшасында ол туралы: «Журналистикаға деген махаббатын телевизия ардагері Н.Иманғалиұлының «Бай-қуатты болайық» деген сөздері оятқан. Қоғамға айшықты ақпарат беріп, ұлтының жанашыры болуды кәсіби миссиясы, ал ұлтсүйер, ұлтына қызмет етер ұрпақ тәрбиелеуді өмірлік мақсаты деп біледі» деп жазған.

Финалда жалпы саны 16 ару бақ сынады. Жоба ережесіне сәйкес сұлулар өнерімен ғана емес, білімімен де сынға түсті. Қазақтың салт-дәрстүрі мен мәдениеті туралы сұрақтар қойылған білім сайысы ерекше тартысты өтті. Көркі көз сүріндірер арулардың ақылы көркіне сай ма, жоқ па осы кезеңде анықталды.

Естеріңізге сала кетейік, «Қазақ аруы-2020» атағының иегері Алматы облысының тумасы 20 жастағы Нарқыз Айдарова болды.