Ауыл мектебінің түлегі әлемнің 15 университетінен шақыру алды

Атырау облысы Жылыой ауданынан келген Нұрсипат Нұрманбетова әлемнің 15 университетінен шақырту алды, деп хабарлайды Orda.kz тілшісі.

Қазір қыз Нью-Йорктегі Пейс американдық университетінің нейрохирургия медициналық факультетінде оқиды. Университет әлемнің үздік 10 университетінің қатарына кіреді. Қазақстандық түлек студенттік қалашықта тегін тұру және 150 000 АҚШ доллары көлеміндегі шәкіртақысы бар грант бойынша білім алуда.

Нұрсипат Жылыой ауданы, Далабай Жазықбаев атындағы №16 орта мектебін бітірген. Тапқыр студент туралы газет-журналдарда бірнеше рет жазылған. Сонымен қатар, ол XXI ғасырдың үздік студенті үлгісінің иегері атанды, БҰҰ Модельдік конгресінің (Model Congress) халықаралық конференциясына қатысты.

— Бүгінде әлеуметтік желілерде отандық медицина жиі сынға ұшырайды. Әрине, еліміздегі медицинаның деңгейін көтеру мәселелері, оның ішінде білікті мамандардың тапшылығы өзекті күйінде қалып отыр. Бірақ біз оны түзетеміз. Сондықтан осы саланы таңдап, болашақ сүйікті мамандығым деп қабылдадым. Мен озық білім мен үлкен тәжірибе алу үшін және, әрине, елге, туған жерге оралу үшін шетелде оқуды шештім. Елге оралған соң жеке емхана ашып, дұрыс диагноз қойып, сапалы ем көрсете алатын үздік маман болуды жоспарлап отырмын, – дейді Нұрсипат.