Автобус жүргізушісін соққыға жыққан жолаушыға 8 жыл бас бостандығынан айыру сұралды

Алматыда 47-ші автобустың қатысуымен үш адам қаза тапқан жол апатына байланысты сот отырысы өтті.

Айыптау орнында жол-көлік оқиғасын тудырған автобус жүргізушісіне қол жұмсаған ер адам отыр. Мемлекеттік айыптаушы оның кінәсі толық дәлелденгенін айтып, сегіз жылға бас бостандығынан айыруды сұрады.

«Сотталушы Дархан Маратұлы Ахметжановты Қазақстан Республикасы Қылмыстық кодексінің 293-бабының 1-бөлігі және 351-бабының 3-бөлігімен кінәлі деп танып, сегіз жылға бас бостандығынан айыру жазасын ең төменгі қауіпсіздік мекемесінде өтеуді сұраймын»,- деді прокурор.

Ол айыпталушының өз кінәсін мойындамайтынын және өкінбейтінін баса айтты.

Алайда кейбір жәбірленушілер мен олардың адвокаттары барлығына жалғыз Дархан Ахметжанов кінәлі деген пікірмен келіспеді. Олардың ойынша, болған оқиғаға автобус жүргізушісі де жауапты.

Мұны әсіресе, жәбірленушілердің бірінің жұбайы Айнұр Құсайынова айтты. Ол Шөкебаеваны сотталушымен жанжалдасты деп айыптап, қайғылы оқиғадан кейін өкініш білдірмегенін, сондай-ақ TikTok желісінде отбасымен бірге түскен видеоларын жариялағанын айтты.

Құсайынова автобус жүргізушілері бұзақы жолаушылардан қорғайтын арнайы кабиналармен жабдықтамаған, жүргізушілерді жол ақысы үшін ақша жинауға, төлемді бақылауға мәжбүрлейтін, оларды өз жұмысынан тыс басқа іспен айналысуға мәжбүрлейтін автобус парктерін қатаң сынға алды.

Естеріңізге сала кетейік, 2023 жылы 22 желтоқсанда сағат 18:15-те № 47-бағыттағы автобустың жолаушысы шығарған жанжал салдарынан есінен танған жүргізуші аялдама маңында тұрған адамдармен соқтығысып, бір әйелді қағып кеткен болатын. Одан кейін жол бойындағы төрт көлікпен соқтығысқан. Салдарынан үш адам қаза тауып, тағы төртеуі жарақат алып, ауруханаға жатқызылды.