Австрия, Чехия, Польша және Словакияны су басу қаупі бар

Орталық Еуропа елдері алдағы демалыс күндері болуы мүмкін су тасқынына шұғыл дайындалуда. Чехиядағы толассыз жауған жауын көршілес Польша, Германия, Австрия және Словакияда жағымсыз табиғи зардаптарға әкеледі, деп жазды Deutsche Welle.

Лондонның Императорлық колледжінің зерттеушілері Орталық Еуропада жауған алапат жаңбыр климаттың өзгеруінің тікелей салдары екенін хабарлады. Олар қазба отын шығарындыларымен жылытылатын жылы атмосфера ылғалды көбірек ұстай алады, бұл жауын-шашынның көп болуына әкеледі дейді.

Метеостанция мәліметтері 1950 жылдан бері Германияда, Польшада, Австрияда, Чехияда, Венгрияда және Словакияда қыркүйектегі жауын-шашынның екпіні айтарлықтай күшейгенін көрсетеді. Грантхэм институтының зерттеушісі Джойс Кимутай әлем таза және жаңартылатын энергия көздеріне ауыспайынша, мұндай су тасқыны одан сайын нашарлайтынын атап өтті.

Грантхэм институтының климаттану бойынша аға оқытушысы Фридерик Отто да экстремалды ауа райының жоғары экономикалық шығындары туралы ескертті.

«Германия сияқты жоғары дамыған елдердің де климаттың өзгеруінен иммунитеті жоқ екені анық. Әлемде мұнай, газ және көмір жанып жатқан сайын, жауын-шашын және басқа да экстремалды метеорологиялық құбылыстар көбейіп, планетамызды өмір сүру үшін қауіпті және қымбат орынға айналдырады», - дейді ол.