Ауыстырылмайтын актёр жоқ: «Патруль 7» сериалының премьерасы өтті

3 наурыз күні Salem Entertainment «Патруль 7» сериалының премьерасын өткізді. 2015 жылдан бері жалғасып келе жатқан бұл сериалдың жалғасы Семейде түсірілген. Orda.kz тілшісі премьераға қатысып, актерлермен сұхбаттасты.

Актерлердің айтуынша, сериалдың басты мақсаты – әзіл арқылы қазақ полициясының абыройын көтеру. Семейдің таңдалу себебі – жаңадан құрылған Абай облысын насихаттау.

«Біздің патрульдің басты мақсаты – полиция қызметкерлерінің жұмысын көрсету. Сонымен қатар, бұл толықметражды фильмге бастау болмақ», – деді актер Әділхан Шомбалов.

Кешті Salem Entertainment басшысы Игорь Цай ашып, сериал мен алдағы фильмнің миллиондаған қаралым жинайтынына сенім білдірді.

Кейін продюсерлік қызметті де атқарған Рүстем Омаров сөз алды. Оның айтуынша, сериалды түсіру 50 күнге созылған.

BAS Production бас продюсері Ақылбек Досжанов жобаның қалай басталғанын баяндап, сериал бастапқыда скетч-шоу форматында жоспарланғанын, кейін Саида Игенбектің ұсынысымен қаржы шектеулі болса да, толық сериал ретінде түсірілгенін жеткізді.

Көрермендерге "Патруль 7" сериалының алғашқы екі бөлімі көрсетілді. Актер Еділ Анарбайдың айтуынша, бұл маусым 12 сериядан тұрады, ал 8-бөлім толықметражды фильм ретінде ұсынылады.

Рүстем Омаров сериалдың тек Алматы мен Семейде ғана емес, Қаскелең мен Талдықорғанда да түсірілгенін, ал болашақта басқа қалаларда да түсірілім жүргізу жоспарда бар екенін айтты.

«Біздің мақсатымыз – әртүрлі қалалардан актерлер табу. Мысалы, біз Семейде арнайы кастинг өткіздік, сол себепті эпизодтарда семейлік актерлер көптеп бой көрсетеді», – деді Рүстем Омаров. 

Продюсер Мейіржан Төребаев туралы да өз пікірін білдірді. Оның сөзінше, ауыстырылмайтын адам жоқ.

«Мейіржан Төребаев 5-бөлімнен бастап сериалға қатыспайды. Бірақ кез келген актерді алмастыруға болады. Егер мені алмастырса, орныма басқа Серік келеді», – деді ол.

Кеш соңында "Патруль" сериалының 8-бөлімі толықметражды фильм ретінде 10 сәуір күні жарыққа шығатыны хабарланды.