Ауылда мал бағудың жаңа технологиясы меңгеріліп жатыр (видео)

Дронның көмегімен мал бағуға бейімделген іскер азамат  құрылғы екі қойшының ісін атқарады дейді. Осылайша ол малшылардың  еңбек ақысына жұмсайтын  150 мың теңгесін үнемдейді.

Жамбылдық фермер елде жоқ әдіспен мал бағып, жұртты таң қалдыруда. Қойын құс ұшар биіктіктен бақылап, қашықтан қадағалайды. Мұндай тың тәсілдің арқасында жоғалған малдың саны азайып, еңбек өнімділігі артқан.

Алпысты алқымдаған Гауһарбек Шонтаев екінші топ мүгедегі болса да шаруасын шалқайтып отыр.

— Жылқының қайда кетіп бара жатқанын бақылауға болады. Оның үстіне оларға чип салдырып қойдым. Қай жерде жүргенін үйден көріп отырамын. Дронды сол жаққа тіке бағыттаймын. Қасында қандай адам немесе көлік кетіп бара жатқанын көріп отырасың,  - дейді шаруа.

Ол осы әдіспен 10 шақырым жерден 150-ге жуық малын бақылайды.Осылай техника сырын меңгерген қарапайым шаруа мал төлдеген уақытта  қалып қойған төлді оңай тауып,  ұры-қарыға да тигізбей бағуда.

Ендігі жерде ол мал басын көбейтуді көздеп отыр.