Ауыл сыртындағы ордан 31 жастағы ер адамның денесі табылды

Алматы облысында 31 жастағы ер адамды белгісіз қарудан атып, ауыл сыртындағы орға тастап кеткен күдікті ұсталды.

Бұл туралы Orda.kz Алматы облысының полиция департаментіне сілтеме жасап хабарлады.

16 мамырда полиция бөліміне Іле ауданының Түймебаев ауылынан белгісіз біреулер қарудан оқ атып жатыр деген ақпарат түсті. Белгілі болғандай екі адам арасындағы жанжал, атысқа ұласқан.

Қазіргі таңда тәртіп сақшылары екі азаматты да анықтады. 24 жастағы жергілікті тұрғын ұсталып, полицияға жеткізілді. Ол өзінің адам өлтіргенін мойындады.

 – Күдікті жәбірленушінің мәйітін жасырған орынды көрсетті. Жәбірленуші Алматының 31 жастағы тұрғыны. Ол марқұмның денесін ауыл сыртына апарып, орға тастап, топырақпен көме салған. Қылмыс жасалған қару әзірге табылған жоқ, - деп мәлімдеді полиция бөлімінің баспасөз қызметінде.

Қылмыстық кодекстің 99-бабы бойынша тергеу жұмыстары жүргізіліп жатыр. Қылмыстың себебі анықталып жатыр. Күдікті азамат қамауда.

Қазір 31 жастағы ер адам тапанша арқылы атылған деген болжам бар, қарудың маркасы сараптамада.