12,7 млн гектар ауыл шаруашылығы жері пайдаланусыз жатыр

Былтырдан бері ауыл шаруашылығы жерлерін тиімді пайдалану үшін тұрақты мониторинг жүргізу қолға алынған. Пайдаланусыз-қараусыз қалған ауыл шарушылығы жерлерін қайтару және оны басқа ынталы шаруаларға үлестіру жөніндегі ақпарат әзірге белгісіз.

Дүйсенбіде Орталық коммуникациялар алаңында Цифрлық даму министрлігінің Аэроғарыш комитеті және «Қазақстан Ғарыш Сапары» операторы басшылығы өткізген брифингте ғарыштық зерттеу қорытындысы сөз болды.

– Егістік алқабына жататын 22 млн га жер зерттелді. Оның 685 мың га аумағы мақсатқа сәйкеспейді, дұрыс қолданылмаған, ал 1 млн 90 мың га мүлдем пайдаланылмаған. Мал шарушылығына арналған 76 млн га жайылымның 46 млн га аумағы тексерілді. Ондағы 12,5 млн га жерде мал басы көптігі анықталып, жүктеменің жоғарылағаны байқалды. Жүйеде меженің 20%-ынан аз мал жайылатын, жүктемесі төмен 7,4 млн га жер бары тіркелген. 11,6 млн гектар мүлде қолданусыз қалған, - деді аэроғарыш комитеті төрағасы Баубек Оралмағамбетов.

Құқықтық нормаларға сай әр ірі қараға 6-7 га жер керек. Талап түлік түріне және климаттық аймақтарға байланысты әркелкі.

Жауапты ведомство мен оператор өкілдері мақсатына қарай қолданбаған жерлердің қайтарылуы туралы сауалға кейіннен толықтырып жауап беретінін мәлімдеді.

2019-2021 жылдары Қазақстан облыстарының 61 ауданындағы жайылымдық алқаптар мониторингтен өткізіліп, жалпы аумағы 188 млн га жердің 127,7 млн га аймағы зерделенген. Бақылау нәтижесінде жайылым мақсатындағы жерлердің жағдайы мен өнімділігі, шөп қабаты мен тозу деңгейі анықталған. Мал шарушылығына қолдануға жарайтын жаңа жерлерді анықтау мақсатында бұған дейін жүйеге енбеген 40 млн га шамасында жер зерттелген.

Комитет басшысының айтуынша, жылына ғарыштық мониторинг қызметіне 3,1 млрд теңге қаржы жұмсалады. Бас прокуратура, министрліктер мен жергілікті атқарушы биліктер жүгінеді.