Ауыл шаруашылығы министрлігі Министрлер үйіне көшуге ниетті

ҚР Ауыл шаруашылығы министрлігі елорданың оң жағалауынан Министрлер үйіне көшеді, деп мәлімдеді Ауыл шаруашылығы министрі Ербол Қарашөкеев.

Мұндай шешім министрліктің басқа да министрліктермен жақын болуы үшін қабылданып жатыр.

«Барлық министрліктер сол жағалауда Министрліктер үйінің ғимаратында орналасқан. Өкінішке қарай, бізде ол жаққа көшуге мүмкіндігіміз болмады. Біз тек қаражат іздедік, үкіметке рахмет. Біз министрліктер үйінің үшінші кіреберісіне көшетін боламыз. Әрине, бізге қаланың басқа ауданында алыстау жерде отыруға болар еді. Бірақ та бізге дәстүрлі түрде барлық министрліктер отырған жақын жерде жұмыс істеген жөн деп ойлаймын. Бұл өз кезегінде Ауыл шаруашылығы министрлігі жұмысына да оңтайлы әсер етеді» деп түсіндірді Қарашөкеев.

Еске салсақ, биыл елді қуаңшылық жайлап, мал жаппай қырылды. Журналистер неге министрлік жағдайға қарамастан көшуге қомақты қаражат бөлінгенін сұрады.

«Негізінде, барлық қажетті рәсімдер орындалды. Менің қазір егжей-тегжейі есімде жоқ. Қосымша шешім қабылданғанда біз барлық ақпаратты береміз. Әрине, біз басқа ғимаратқа көшер едік, бірақ қалған ведомстволардың жанында отырғанымыз дұрыс» деп қайталады министр.

Ол журналистерді министрлік ғимаратының көшуге бөлген қаражаты басқа бағдарламаларға ешқандай әсер етпейтіндігіне сендірді.

«Бұл қаражат басқа бағдарламалар бойынша бағытталады және ауыл шаруашылығын, ауыл шаруашылығы тауарларын өндірушілерді қаржыландыру бағдарламаларына ықпал етпейді» деді Ауыл шаруашылығы министрі.

Айта кетсек, бұған дейін Маңғыстау облысының фермерлері Ербол Қарашөкеевтен отставкаға кетуін сұраған. Себебі, көктемде басталған құрғақшылық араға тоғыз ай салса да өз салдарын тигізіп келеді.