Ауыл шаруашылығы министрлігі мен әкімдер жауап беруі керек - Тоқаев

Мемлекет басшысы Қасым-Жомарт Тоқаев сыбайлас жемқорлықпен күрес мәселелері бойынша кеңес өткізді.

Мемлекет басшысының айтуынша, соңғы жылдары сыбайлас жемқорлыққа қарсы іс-қимыл бойынша нақты шаралар қабылданғанымен, түбегейлі өзгерістер әкелмеген.

Ауыл шаруашылығындағы көптеген парақорлық фактілері анықталды: соңғы бес жылда мемлекет шаруаларды қолдауға 2 трлн теңгеден астам қаржы бөлді. Осы уақыт ішінде бұл салада 960 қылмыс тіркеліп, 450 адам қылмыстық жауапкершілікке тартылды.

«Осының барлығы уәкілетті органдардың жауапсыздығынан болды. Мұндай ысырапқа жол берген Ауыл шаруашылығы министрлігі мен әкімдер жауапты болуы керек» деді мемлекет басшысы.

Мемлекет басшысы ақпараттық жүйелер мен деректер базасы мәселелеріне тоқталды. Цифрландыру министрлігіне мемлекеттік органдар әзірлеген барлық ақпараттық жүйелерге аудит жүргізу тапсырылды.

Президент сыбайлас жемқорлыққа қарсы іс-қимылдың барлық бағыттарын түбегейлі қайта қарауға шақырды, сондай-ақ уәкілетті органдарға бірқатар міндеттер қойды.

«Кеден, құрылыс, білім және денсаулық сақтау салаларындағы сыбайлас жемқорлықпен күреске ерекше назар аудару қажет. Жауапты министрліктер осы салалардағы сыбайлас жемқорлықты жоюдың жоспарын жүйелі түрде әзірлеуі керек» деді Тоқаев.

Бағаларды белгілеудегі жемқорлық

Елбасы мемлекет реттейтін бағаларды белгілеуде сыбайлас жемқорлықты жоюға ерекше назар аударды. Мемлекет басшысы мемлекеттік сатып алулар мен квазимемлекеттік сектордағы сатып алулардың бүкіл жүйесін қайта қарауды тапсырды. Ол мемлекеттік сатып алуларға беделі бар, тиісті техникасы бар, білікті жұмысшылары бар, салықты уақтылы төлейтін өндірушілер қатысуы керек деп есептейді.

«Көбінесе, қолданыстағы барлық реттеуші сүзгілерге қарамастан, осы немесе басқа тендерді кім жеңетіні белгілі. Мәселен, екі жылда «Қазавтожол» техникалық қадағалау қызметін сатып алу бойынша 99 тендер өткізген. Олардың тең жартысын үлестік белгілері бар төрт компания жеңіп алды» деді президент.

Сонымен қатар, мемлекет басшысы мемлекеттік-жекеменшік әріптестік саласында сыбайлас жемқорлыққа қарсы бақылауды күшейту қажет деп санайды. Үкімет МЖӘ заңын түбегейлі жаңартуды қарастыруы керек. Президент салық және кеден саласындағы сыбайлас жемқорлықты жою мәселелеріне жеке тоқталды.

Тоқаев азаматтар арасында ақпараттық-түсіндіру жұмыстарын күшейтуге шақырды.

«Жалпы, бізге ескі әкімшілік әдістерден бас тартып, барлық жерде заманауи басқару технологияларына қайта бағдарлану керек. Мемлекеттік қызмет істері жөніндегі уәкілетті орган іс жүзінде сервистік және тұтынушыға бағдарланған болуы үшін мемлекеттік қызмет жүйесін толығымен қайта іске қосуы керек» деп түйіндеді сөзін мемлекет басшысы.