Ауыл шаруашылығы министрі өзінің отставкаға кетуін талап еткен шаруаның үйіне келді

ҚР Ауыл шаруашылығы министрі Ербол Қарашөкеев Маңғыстау облысындағы шалғайдағы шаруашылықтарды аралап, ірі қара, ұсақ мал және жылқы малдарын азықтандырудың жай-күйін көріп қайтты.

Ол желтоқсан айында Нұр-Сұлтанда министрге қызметінен кетуді ұсынған фермердің үйіне де соғып шықты.

Шаруаның жылқы мен түйе өсіретіні, бірақ оның малдары есепке алынбағандығы белгілі болды. Егер оның малдары қырылып қалса, ол мемлекеттен өтемақы ала алмайды. Себебі, оның малдары қағаз бойынша жоқ, еш жерде тіркелмеген.

Бұл бір ғана шаруаның басындағы жағдай емес. Бұл аймақта көптеген шаруалар малдарын әлі есепке тұрғызбаған. Төтенше жағдай орын алса, олар мемлекеттен өтемақы ала алмай, құрдымға кетеді.

Осындай шаруалар субсидия талап етеді. Бірақ министрлік жоқ малға ақша бөле алмайды.

«Ербол Қарашөкеев министр болғалы біз үшінші рет шаруалар үшін «жасыл» дәліз ашып отырмыз: бұл олардың есепке алынбаған малдарын тегін тіркей алатынын білдіреді» деді Ауыл шаруашылығы министрлігінің баспасөз қызметі.

Заң бойынша ірі қара мал туған кезден бастап екі айдың ішінде есепке алынуы тиіс. Кешіккендер айыппұл төлейді. Алайда, «жасыл» дәліз ашық болса, айыппұл төлеудің қажеті жоқ.

Қазіргі «жасыл» дәліз 2022 жылдың 1 ақпанынан 31 мамырына дейін ашық.

Жедел деректерге сүйенсек, Қазақстанда бүгінде есепте жоқ 432 мың басқа жуық мал бар.