Ауыл шаруашылығы министрі ет бағасының қымбаттауына қатысты пікір білдірді

ҚР Ауыл шаруашылығы министрі Ербол Қарашөкеев ет бағасының өсуіне қатысты пікір білдірді.

Парламент палаталарының бірлескен отырысынан кейін министр қымбаттап жатқан ет бағасына қатысты түсініктеме берді. Оның айтуынша, министрлік ауыл шаруашылығы тауарын өндірушілер деңгейінде ет бағасын бақылап отыр.

«Кеше баға түсіп жатыр деп айтты. Көтерме баға өсіп жатқан жоқ. Ауыл шаруашылығы тауарын өндірушілер бойынша қатты өсім байқалмайды, біз бағаны ұстап тұрмыз» деді Қарашөкеев.

Министр қазіргі таңда басқа мәселе өзекті екенін алға тартты.

«Мал өсірушілер етті сатып алу бағасының төмен екеніне шағымдануда. Кеше тыңдау өтті, депутаттар осы мәселені қозғады. Мал өсірушілер еттің сатылу бағасы тым төмен екеніне наразы. Сол үшін бізге жаңа нарық ашып, фермерлерге қолдау көрсетуіміз қажет» деді ауыл шаруашылығы министрі.

Қарашөкеевтің айтуынша, қазір Қазақстан өзін етпен толығымен қамтамасыз етіп отыр.

«Баға деген үнемі өседі, бірақ қатты өсім жоқ» деді ауыл шаруашылығы министрі.