Ауыл әйелдерінің III форумы өтіп жатыр

Жиында ауылдағы өмір сапасын арттыру бағытындағы бастамалары және тұрақты даму мақсаттарын орындау бойынша жетістіктері талқыланды. Нәзік жандылар мұндай басқосулардан шабыт алып, тәжірибе алмасуға таптырмас амал екенін айтып отыр.

«Мен бүгін біз үшінші рет өткізіліп жатқан ауыл әйелдерінің біріктіруші және ынталандырушы алаңына айналған үшінші республикалық форумды ашып отырғаныма өте қуаныштымын. Жыл сайын қатарымыз жаңа есімдермен толықтырылып жатыр. Өкінішке орай, аналарымыздың жұмысын көріп, қолдап қайту үшін біз биыл ауылдарға бара алмадық. Көріп отырғаныңыздай, қашықтық бізге кедергі емес, онлайн режимде де кездесіп отырмыз. Әрқайсыңыз өз ауылының қамын жеген өз өңіріңіздің көрнекті өкілісіз. Президент өзінің Жолдауында айтқандай, бәсекеге қабілетті экономика ауыл шаруашылығын дамытпай құрылмайды», - деді Майра Айсин.

Мәжіліс депутатының айтуынша Қазақстан халқының жартысы ауылда тұрады. Ал оның 4 миллионы әйелдер.

«Форум жұмысы агроөнеркәсіптік кешеннің дамуына айтарлықтай серпін беретініне сенімдіміз. Бұл әйелдердің әлеуметтік мәртебесін жақсартады. Сүттің 70% және көкөністердің 90% жеке қосалқы шаруашылықтарда өндіріледі. Президенттің жеке қосалқы шаруашылықтардың әлеуетін шешуші түрде пайдалану қажеттілігіне назар аударуы бекер емес. Елімізде әйелдер ауылдың дамуы үшін орасан зор еңбегін сіңіруде», - деді ол.

Форум барысында «Ауыл» Халықтық-демократиялық патриоттық партиясы мен «Қазақстан әйелдерінің аграрлық одағы» ЗТБ арасында ынтымақтастық туралы Меморандумға қол қою салтанаты өтті.

ҚР Президенті Әкімшілігі басшысының бірінші орынбасары Дәурен Абаев Қазақстанның ауыл әйелдерінің III форумына қатысушыларды құттықтап, ерлермен қатар елеулі еңбек етіп жүрген нәзік жандылардың жұмысына сәттілік тіледі.

Дәурен Абаевтың айтуынша, бүгін де әйелдер өздерінің ашқан кәсіпорындарының арқасында бірегей өндірісті іске қосып, мыңдаған адамды жұмыспен қамтамасыз етіп отыр. Сонымен қатар өскелең ұрпақты тәрбиелеп, отбасы құндылықтарын сақтаудың маңызды рөл екендігін ескеріп, нәзікжандыларға алғысын білдірді.