«Аутист балаларды өлтіру керек»: Блогер желіде жазған пікіріне жауап береді

Autism Kazakhstan ұлттық қауымдастығы Бас прокуратураға және ҚР ІІМ-не блогер Райхан Жұмамұратованың пікіріне қатысты ресми шағым жолдады, деп хабарлайды Orda.kz.

Блогердің әлеуметтік желідегі пікірі қоғамда дүрбелең тудырды. Еске салайық, тамыз айының соңында Алматыда анасының жанында жүрген кішкентай баланың қасына белгісіз жасөспірім келіп, оны еш себепсіз көтеріп, бар күшімен жерге лақтырып жіберген еді. Блогер Instagram желісінде осы оқиға бейнесінің пікір бөлімінде жазба қалдырған. 

Дамуында өзгерісі бар балалардың ата-аналары блогердің бұл пікірін зорлық-зомбылыққа шақыру және осал балаларға деген өшпенділік деп санады. Сондықтан қауымдастыққа жаппай шағым түсе бастады. Кейін құқық қорғау органдарына ресми өтініш жіберілді. Алматы полициясы осы факті бойынша тексеруді бастады.

Айта кетейік, Алматыда кішкентай баланы жерге лақтырған жасөспірімнің үстінен қылмыстық іс қозғалды.