«Ауруын емдеу үшін»: есепші 26,5 млн қаражат жымқырған

2020 жылдан 2024 жыл аралығында «Балқаш аудандық жұмыспен қамту және Әлеуметтік бағдарламалар бөлімі» ММ-нің бас маманы – есепшісі мемлекет қаражатын негізсіз жымқырып келген, деп хабарлайды Orda.kz. 

Ол ай сайын өзінің және әріптестерінің жеке есеп шоттарына бекітілген мөлшерден артық жалақы аударып отырған. Сондай-ақ тиісті бұйрықсыз ақшалай сыйақы, материалдық көмек, біржолғы әлеуметтік төлемдер және іс-сапар шығындары үшін өтемақы алған.

Сотталушы әріптестеріне артық аударылған ақшаны «қате аударылған» деп сендіріп, оны өзінің жеке шотына аударуды сұраған. Осылайша ол қаражатты өз ауруын емдеу үшін пайдаланған.

Сотталушы мемлекетке 26,5 млн теңге көлемінде материалдық залал келтірді. Балқаш аудандық сотының үкімімен Т.-ға ҚК-нің 189-бабының 4-бөлігі 2)-тармақшасы бойынша есепші 7 жылға бас бостандығынан айырылды.