«Ауруханаға түсті»: Ақтөбеде 9 жыл әкім болған азамат өзіне қол жұмсамақ болды

Ақтөбе облысында еңбек демалысында жүрген ауыл әкімі суицид жасауға оқталды. Полиция тергеу амалдарын бастады, деп хабарлайды Orda.kz.

Ақтөбе облысы Алға ауданы Бестамақ ауылының әкімі Қанат Дәулеталинге қатысты ақпарат әлеуметтік желіде тарады. Желі қолданушысы Марлен Баймағамбетов өз парақшасында:

«Бестамақ ауылында 2025 жылдың маусым, шілде айында ауыл әкімі Қанат Даулеталинге қандай болса да, пышақтау, болмаса травматикалық қарудан жарақат алу фактілері болды ма? 05.07.2025 жылы Алға орталық ауруханаға Бестамақ округі әкімі Даулеталин келіп түсті ме? Қандай жағдайда түсті? Қашан жансақтау бөлімінен палатаға ауысты? Сол Даулеталин өз-өзіне қол жұмсау фактісі бойынша, іс тіркелді ме?», — деген жазба қалдырды.  

Orda.kz тілшісі ақпаратты аудан әкімдігіне хабарласып, анықтады.

«Қазір қалай болғанын айту қиын. Тергеу кезінде анықталады. Ол 2016 жылдан бері Бестамақ ауылдық округінің әкімі. Өзі сол ауылдың баласы. 30 маусым мен 22 шілде аралығында еңбек демалысында болған. Келіншегі қасында, үш баласы бар», — деді Алға ауданының әкімі Асланбек Шүйіншіәлиев.  

Дәрігерлер ауыл әкімінің жағдайы тұрақты екенін хабарлады. Мемлекеттік қызметкер өзінің диагнозын жариялауға тыйым салған. 

«7 шілдеде Алға аудандық ауруханасына 47 жастағы ер адам түсті. Жағдайы тұрақты, жалпы палатада ем қабылдап жатыр. Қазақстан Республикасының «Халық денсаулығы және денсаулық сақтау жүйесі туралы» Кодексінің 95-бабына сәйкес диагноз дәрігерлік құпия санадады. Келісімсіз жариялауға тыйым салынады. Науқас келісім бермеді», — деп хабарлайды денсаулық сақтау басқармасы.  

Ақтөбе облысының полиция департаменті өз-өзіне қол жұмсау әрекеті бойынша сотқа дейінгі тергеу жүріп жатқанын хабарлады.

«Оқиғаның мән-жайы анықталып жатыр. Өз-өзіне қол жұмсау әрекеті бойынша тергеу жүріп жатыр. Қылмыстық тергеп-тексеру шеңберінде басқа мәліметтер жария етілмейді», — деді Ақтөбе облысының ПД.

Даулеталин Қанат Сағынғалиұлы — 1978 жылы Ақтөбе облысы, Алға ауданы, Бестамақ ауылдық округіне қарасты Бесқоспа ауылында дүниеге келді. Білімі жоғары. 1999 жылы Қ.Жұбанов атындағы Ақтөбе педагогикалық институтының «Қазақ тілі және әдебиет» мамандығын бойынша бітірген. 2023 жылы Қазақ-орыс Халықаралық университетінің «Қаржы» мамандығы бойынша  бітірген. Еңбек жолын 1999 жылы В.И.Пацаев атындағы №2 Алға орта мектебінде «Қазақ тілі мен әдебиет» пәнінің мұғалімі болып бастады. 2001 жылы Алға аудандық білім бөлімінде істеп, 2005 жылы В.И.Пацаев атындағы Алға орта мектбінің әдіскері болды. Ал 2006 жылы Бесқоспа орта мектебінің директоры, 2009 жылы Бестамақ орта мектебінің директоры, 2016 жылы Бестамақ ауылдық округінің әкімі болып тағайындалды.

Автор: Ардақ Ерубаева